BARANGAY/SK ELEKSYON

BARANGAY ken SK ELEKSYON:

Ladawan ti Nakillo a Politika

Kas kapadasan ken kapaliiwan iti eleksyon idi October 29, 2007, nagbalin ti Barangay ken SK Eleksyon a ladawan ti nakillo a sistema politika kas ibuksilan dagiti sumaganad a pasamak;

1. Pannakalabsing ti common poster area a kas pagannurotan nga ituding ti COMELEC. Naikabil dagiti campaign posters iti uray sadino a lugar ken iti agduduma a sizes.

2. Pannakasalungasing ti requirement a drug test a kas kiddawen ti linteg gaputa adda dagiti kandidato a bimmulod lattan wenno nagsinnublat iti urine specimen tapno laeng mapaneknekan a negative iti panagaramat ti droga.

3. Pannakaaramat ti kuarta a pagpasuksok tapno magatang dagiti botos. Nagtaud dagiti kuarta kadagiti nalimed a nakibiang iti eleksyon wenno inur-or manipud kadagiti kabagian iti ballasiw-taaw.

4. Pannakibiang a nalimed dagiti adda iti saad ti bileg ken turay tapno maipatugaw dagiti pasurotda a kayatda mangabak ket mataginayon ken agtalinaed iti puesto.

5. Pannakagatang ti botos dagiti SK babaen iti mismo a pannakaaramat ti kuarta wenno panangibaklay iti gasto ti drug testing ken filing fee tapno maipasigurado a kukua ti botos.

6. Panangibotos ti maysa laeng a kandidato gaputa daytoy ket mabalin a naggatang, kabagian wenno gayyem. Daytoy ket managimbubukod a wagas-panagbotos.

7. Pannakaipasdek ti political dynasty gaputa mangrugin a maipasublat, Maipatawid ken bukodan ti agasawa, agkabsat, agama wenno agina ti saad ti bileg ken turay iti Barangay.

8. Pannakaipagna ti un-opposed candidacy gaputa kapatang wenno bayadan dagiti adda ti saad iti bileg ken turay dagiti agpanggep a sumango tapno agsanud ket agparang nga un-opposed dagiti kayatda nga ipatugaw a kandidato.

No ti ladawan ti Barangay ken SK Eleksyon ket nakillo, daytoy ket isagmaknatayo iti agtultuloy a KORAPSYON ken Social Injustice a mangdadael iti biag. Daytoy ket pammaneknek a ti wagas-politikatayo ket nagbalinen a kultura a mapasamak manipud ngato agingga iti baba. Ti karit ti Ebanghelio ni Jesus ket tubngaren ken umikkat iti daytoy a sistema ti nakillo a politika ket agtignay a mangpasayaat-biag iti Purok-Gimong wenno BEC.