DOBLE KARA A HUSTISIA

Nasurok a makabulan ti napalabas manipud idi inyetnag ti Sandigang Bayan ti pangngeddengna a nagbasol ni Erap Estrada iti kaso a plunder.. Segun ti napaneknekan ti Sandigang Bayan, inaramat ni Erap ti saad-kinapresidente tapno agtakaw / agkurakot ti adu a kuarta manipud iti pondo dagit umili. Kas imandar ti linteg, rumbeng a maibalud ni Erap iti tungpal biag kas pannusa iti nadagsen unay a naglabsinganna. Ngem sakbay a sagrapen ni Erap ti dusa ti nagbasolanna, inted ni GMA ti presidential pardon tapno mawayawayaan ni Erap. Ania ti ibunga daytoy a pasamak iti biagtayo?

Ti basol a plunder ket panagkurakot iti pondo dagiti umili. Dagiti umili ti natakawan ket nagbalin a napanglaw. Ti basol a plunder nga inaramid ni Erap ket isu’t ramut ken nangpakaro iti kinapanglaw. Ngarud ti nagbasolan ni Erap ket dagiti umili a Pilipino. Ti pardon a naited kenni Erap ket ibagana nga mabalin dagiti adda iti nangato a saad ti gobierno ti agtakaw ket mapakawandanto met.

Ti naited a presidential pardon kenni Erap ket ipakitana ti kinakapsut ken kinababa ti sistema-politikatayo. Ti pardon a naited kenni Erap ket maysa a kita ti political accommodation for political survival. Mangted iti pabor tapno agtalinaed iti turay. Ti politikatayo ket ipangrunana ti bukod a pagsayaatanna uray pay maballikug dagiti paglintegan ken malipatan dagiti napanglaw.

Ti naited a presidential pardon kenni Erap ket taginayonenna ti kultura ti korapsyon, kultura ti doble-kara a hustisia, kultura ti padrino ken kultura ti moro-moro. Mapakawan ti nabaknang a nagtakaw iti bilyon manipud iti pondo ti umili, ngem maibalud ti mabisin a napanglaw a nagsipdut ti igatangna ti sardinas a pangpakanna ti pamiliana.

Ni GMA, sumagmamano nga Obispo ken nangato a turay-gobierno ket irasonda a ti presidential pardon a naited kenni Erap ket para iti reconciliation ken humanitarian reason. Kasano met ngarud dagiti milyon a mangmangged a saan a maited dagiti benepisyoda, dagiti mannalon nga awan dagana, dagiti biktima ti extra-judicial killings, dagiti naibalud nga awan basolna, dagiti napanglaw, dagiti awanan trabaho? Adda kadi met humanitarian reason a maited kadakuada?

Siasinoman a napaneknekan a nagbasol iti linteg ket rumbeng a madusa. Uray pay presidente, gobernador wenno artista, amin ket agpapada iti imatang ti linteg ken hustisia. Ti pudno nga anag ti linteg ken hustisia ket ipangrunana ti natalged a biag para iti amin—saan a para laeng iti maysa a tao.