DOBLE KARA A HUSTISIA

Nasurok a makabulan ti napalabas manipud idi inyetnag ti Sandigang Bayan ti pangngeddengna a nagbasol ni Erap Estrada iti kaso a plunder.. Segun ti napaneknekan ti Sandigang Bayan, inaramat ni Erap ti saad-kinapresidente tapno agtakaw / agkurakot ti adu a kuarta manipud iti pondo dagit umili. Kas imandar ti linteg, rumbeng a maibalud ni Erap iti tungpal biag kas pannusa iti nadagsen unay a naglabsinganna. Ngem sakbay a sagrapen ni Erap ti dusa ti nagbasolanna, inted ni GMA ti presidential pardon tapno mawayawayaan ni Erap. Ania ti ibunga daytoy a pasamak iti biagtayo?

Ti basol a plunder ket panagkurakot iti pondo dagiti umili. Dagiti umili ti natakawan ket nagbalin a napanglaw. Ti basol a plunder nga inaramid ni Erap ket isu’t ramut ken nangpakaro iti kinapanglaw. Ngarud ti nagbasolan ni Erap ket dagiti umili a Pilipino. Ti pardon a naited kenni Erap ket ibagana nga mabalin dagiti adda iti nangato a saad ti gobierno ti agtakaw ket mapakawandanto met.

Ti naited a presidential pardon kenni Erap ket ipakitana ti kinakapsut ken kinababa ti sistema-politikatayo. Ti pardon a naited kenni Erap ket maysa a kita ti political accommodation for political survival. Mangted iti pabor tapno agtalinaed iti turay. Ti politikatayo ket ipangrunana ti bukod a pagsayaatanna uray pay maballikug dagiti paglintegan ken malipatan dagiti napanglaw.

Ti naited a presidential pardon kenni Erap ket taginayonenna ti kultura ti korapsyon, kultura ti doble-kara a hustisia, kultura ti padrino ken kultura ti moro-moro. Mapakawan ti nabaknang a nagtakaw iti bilyon manipud iti pondo ti umili, ngem maibalud ti mabisin a napanglaw a nagsipdut ti igatangna ti sardinas a pangpakanna ti pamiliana.

Ni GMA, sumagmamano nga Obispo ken nangato a turay-gobierno ket irasonda a ti presidential pardon a naited kenni Erap ket para iti reconciliation ken humanitarian reason. Kasano met ngarud dagiti milyon a mangmangged a saan a maited dagiti benepisyoda, dagiti mannalon nga awan dagana, dagiti biktima ti extra-judicial killings, dagiti naibalud nga awan basolna, dagiti napanglaw, dagiti awanan trabaho? Adda kadi met humanitarian reason a maited kadakuada?

Siasinoman a napaneknekan a nagbasol iti linteg ket rumbeng a madusa. Uray pay presidente, gobernador wenno artista, amin ket agpapada iti imatang ti linteg ken hustisia. Ti pudno nga anag ti linteg ken hustisia ket ipangrunana ti natalged a biag para iti amin—saan a para laeng iti maysa a tao.

HUSTISIA, TULBEK TI BIAG A NAGIN-AWA

Pakauna:

Ti hustisia ket isu’t tulbek ti biag nagin-awa. Daytoy ket karbengan nga agtaud iti Dios a rumbeng a maited iti amin a tao, saan ketdi a kukua ken prebilihiyo laeng ti sumagmamano a nabaknang ken nangato. Ti linteg-gobierno ket isu’t natudingan a kangrunaan a mangipatungpal iti hustisia nga agbatay iti dignidad ti tunggal tao, saan ketdi a kumanunong iti sumagmamano gapu iti saad wenno pasuksok a naawat.

Maiyetnag ti Hustisia iti Siasinoman a Naglabsing
Idi Septiembre 13, 2007, milyon a tao iti entero a lubong ti sipapasnek ken sigagagar a nanguray ti pangngeddeng nga iyetnag ti Sandigang Bayan iti kaso a nakaidaruman ni Erap Estrada, dati a Presidente ti Pilipinas.
Apaglabes bassit iti alas nuebe iti bigat iti dayta nga aldaw idi naibasa ti Pangngeddeng. Ket segun kadagiti tallo nga ukom iti Sandigang Bayan, Ni Erap ket napaneknekan a not guilty beyond reasonable doubt iti kaso a Perjury, ngem napaneknekan a guilty beyond reasonable doubt iti kaso a Plunder wenno panaglabsing iti Republic Act # 7080. Gapu iti daytoy, impataw ti Sandigang Bayan a sagrapen ni Erap ti dusa a Reclusion Perpetua wenno pannakaibalud iti uppat a pulo (40) a tawen. Malaksid iti pannakaibalud, imandar pay ti Sandigang Bayan nga isubli ni Erap iti gobierno dagiti amin a sanikua ken kuarta nga Innalana kas napaneknekan ti korte.

Ania dagiti Linabsing ni Erap segun ti Napaneknekan ti Sandigang Bayan?
Kalpasan iti Agarup innem a tawen a pannakausig ti kaso ni Erap Estrada, ken kalpasan a naiparang ti depensa ken prosecution dagiti nagkaadu a testigo ken dokumento a kas ebidensiya, tiningiting ti korte dagitoy a testimonia ken ebidensiya ket napaneknekanna nga awan duduana a ni Erap ket nagbasol iti Plunder gapu kadagiti sumaganad:]
Immawat ti P545 milyon a kas pasuksok manipud jueteng.
Immawat iti P130 milyon a kas pasuksok manipud Tobacco Excise Tax ditoy Ilocos Sur.
Immawat iti P189.7 milyon a kas pasuksok manipud Belle Corporation.
Agtagikua iti P3.23 bilyon a naideposito iti Equitable PCI-Bank, Binondo, Manila Branch, iti parbo a nagan Jose Velarde.
Amin dagitoy a gatad ti kuarta ken naurnong ken inawat ni Erap kabayatan ti panagtakemna a kas Presidente. Ket nainget nga iparit ti linteg a maaramat ti saad a kinapresidente tapno agkamkam iti adu a sanikua.

Ania ti Koneksyonna daytoy a Pasamak iti Bukodtayo a Probinsiya?
Naakusaran ni Erap a kas Lord of all Jueteng Lords. Segun iti Korte, napaneknekan nga immawat iti pasuksok manipud iti kuarta a nagtaud iti jueteng ken pondo ti RA 7171. Nabayag a naibalud ni Erap agingga ita a nasentensiaanen. Ngem ti makariribuk a kinapudno ket agtultuloy met ti jueteng ditoy probinsiyatayo. Siasino ti pudno a jueteng lord? Siasino ti umaw-awat iti jueteng? Ania ti napasamak iti P130 milyon a pondo ti RA 7171 a kuarta dagiti mannalon? Kadagitoy a pasamak, adda kadi met hustisia ditoy probinsiyatayo?

Ania ti Rumbeng nga Aramidentayo?
Ti jueteng ket pespesenna ken kurimesenna amin a kuarta dagiti napanglaw, ket bumaknang ti sumagmamano ti korapsyon ket takawenna ti kuarta a rumbeng koma a maipaay kadagiti tattao, tapno bumaknang laeng dagiti adda iti saad ti bileg ken turay. Jueteng ken korapsyon ti dua a kangrunaan a mangpakaro ti kinapanglaw ditoy ili ken probinsiyatayo. Dagitoy ti lapped ti hustisia ditoy ili ken probinsiyatayo.
Rumbeng ngarud nga isardengtayo ti agpusta iti jueteng. Ket ti gobierno probinsiyal, isardengna a maminpinsan ti jueteng kadagiti amin nga ili ditoy Ilocos Sur. Kasta met nga Agridam ken siputantayo ti pannakagasto dagiti pondo tapno malapdan ti korapsyon. Amirisen ken kitaen a nasayaat ken umiso ti pannakaisayangkat dagiti proyekto. Saan a sub-standard a pangliksaban ti dakkel a komisyon. Rumbeng a maigasto dagiti pondo iti ituyang ti linteg, saan a ti kayat ti agturay.


PANGGIBUS:
Ti hustisia ket saan laeng nga agpatingga iti korte. Ti hustisia ket sakupenna iti umiso a panangidaulo nga agbatay iti integrity, transparency ken accountability. No ilukattayo ti panunottayo kadagiti pasamak ditoy probinsiyatayo—adda kadi integrity, transparency ken accountability? Ti makariribuk a saludsod ket—iti agdama, ADDA KADI HUSTISIA DITOY ILI KEN PROBINSIYATAYO?

SK/BARANGAY ELECTIONS

TIGNAY MISYON

Kas gimong a sumurot ken Jesus iti misyon-mangwayawaya, intay agtignay a mangbalbaliw ti makaadipen a bileg ken turay a naisangal iti barangay eleksyon.
Amirisen ti makaadipen ken makairurumen a sangal ti politika. Kas ibuksilan ti napalabas nga eleksyon idi Mayo 14, napaneknekantayo a ti wagas-eleksyon ket napnoan panagsuitik. Naaramat dagiti nagtakem a nangballikug ken nangsukat ti resulta ti eleksyon tapno paboranna dagiti kandidato nga idiktar dagiti adda iti ngato. Nagbalin ti langa ti politikatayo a:

Bukodan ti agassawa wenno pagsisinnublatan dagiti kameng ti maysa laeng a pamilia (political dynasty).
Politika a pilien ken idiktar ti adda iti ngato dagiti pasurotna nga agturay (remote-controlled politics).
Politika a gatangen ken butbutngen dagiti kasangona (un-opposed candidacy), ken
Politika a patarayen ken maneharen ti kuarta a nagtaud kadagiti jueteng operators.
Barangay Eleksyon, Maaramat iti Partisan Politics

Segun ti imandar ti linteg, ti Barangay Eleksyon ket agtalinaed koma a non-partisan. Iparit ti linteg a makibiang dagiti opisyales-barangay iti partisan politics—kastoy met ti rumbeng a masurot pagannurotan iti SK eleksyon.
Ngem iti agdama, nagbalin ti Barangay ken SK Eleksyon a partisan ken ar-aramaten dagiti adda iti nangato a turay tapno ipatugawda dagiti kaduada ken agtalinaedda iti saad ti bileg ken turay.

Mapili ti ABC President ken SK Chairman a kas kadua ti adda iti saad ti bileg ken turay. Magatang, maregaloan ken mapasuksokan dagiti agbotos a kapitan wenno SK tapno mangabak ti pasurot dagiti adda iti turay. Gapu iti daytoy, makaadal dagiti agtutubo iti nakillo ken nasuitik a wagas-politika, imbes a mamuli ken matubay dagiti panunot ken nakemda iti kinapudno ken kinalinteg. Mataginayon ti patronage ken pay-off politics, imbes a panagserbi para iti sapasap a pagimbagan.

Mataginayon daytoy makaadipen a tengngel ti kinaturay babaen kadagiti paar-aramat nga organisasyon a nakaikamengantayo ken panagdadawat iti pabor. Intay umikkat iti tengngel ti kinaturay, ket datayo a bumarangay ti mangpili kadagiti pudno a mangidaulo para iti pagimbagan ti amin. Umikkat kadagiti organisasyon a paar-aramat ket liklikan ti agdadawat ken umawat kadagiti pabor a mangtengngel kadatayo.

Rumkuas tayo iti makaadipen a wagas ti biag-politika

"EL SANTO CRISTO MILAGROSO"

In this Church of Sinait, Ilocos Sur, Philippines, is a life size Black Crucified Christ which is believed to have come from Nagasaki, Japan in 1620. The early Spanish Missionaries must have brought images for the early Japanese Christians. Christians were persecuted in 1597, the Japanese converts must have the anger of the rulers and not to be detected as Christians.

The images of the Black Crucifix and of the Blessed Virgin Mary placed in a box must have drifted in the sea until they reached the boundary shores of Sinait, Ilocos Sur and Badoc, an adjacent town in Ilocos Norte, in 1620. The Black Christ was taken to the Church of Sinait and it was locally known as: "El Santo Cristo Milagroso," whle the Blessed Virgin Mary was taken to Badoc Church known as: "La Virgen Milagrosa."

In 1656, the Black Crucifix was taken to Vigan, the capital town of Ilocos Sur, because an epidemic was raging and through the devotion of the people many were cured. Hence, it is considered as intercessor of all kinds of afflictions and illnesses. From that time on, devotion to the Santo Cristo Milagroso spread. Every Friday, many people from other places flock to the Sanctuary of Sinait for devotion and intercession especially on the Feast of Santo Cristo Milagroso on every 3rd day of May.

Tignay-Saluad-Tangatang

Tignay- Saluad– Tangatang:
Salaknibantayo ti Biagtayo
Manipesto Bikariato San Markos

Pakauna:

Ti pudno a makawayawaya a Pammati dagiti gimong a sumurot kenni Jesus ket Pammati nga agtignay a mangtaming kadagiti pakaseknan ti sibubukel a biag. Kas Bikariato a sumurot kenni Jesus iti Misyon–Mangwayawaya, iti maikasangapulo a Sanay Bikariatotayo, nagkaykaysaantayo ti agtignay a kas gimong iti Bikariato tapno makatulongtayo a mangatipa ti panagkaro ti Global Warming ken maliklikan ti nakaam-amak nga ibungana iti biagtayo.

I. Kasasaad-Aglawlaw: Global Warming
A. Ania ti maikagapu iti Global Warming?
Ti Global Warming ket saan a dusa nga iyetnag ti Dios kadatayo. Ti Global Warming ket saan a kadawyan a pasamak iti nakaparsuaan (Natural Occurrence). Ti Global Warming ket pinarnuay ti dakes, nakillo ken naagum a wagas ti panagbiagtayo. Ti Global Warming ket isu’t kumarkaro a panagpudot ti tiempo. Daytoy ket imbunga ti pannakadadael ti Ozone Layer ket ti pannakaurnong iti adu unay a kemikal (Carbon Dioxide) iti tangatang tayo. Ti panagpuor kadagiti plastic, panagaramat kadagiti kemikal nga abono ken pestisidio, asuk nga ipugso dagiti lugan, ken panangdadael kadagiti kabakirantayo ket isu’t maikagapu ken mangpakaro iti Global Warming.

B. Ania ti nakaam-amak nga ibunga ti Global Warming?

Gapu ti agtultuloy a Global Warming, marunaw dagiti yelo ken ngumato ti level ti danum kadagiti baybay ken taaw ket lumned dagiti lugar nga adda iti igid baybay a pakairamanan ti Ilocos Sur. Rumsua dagiti adu a didigra a kas iti napigsa a bagyo, layus, tikag ken maparnuay dagiti adu a kita ti makapatay a sakit.

Kas mariknatayo, dagitoy a bulan ket tiempo koma ti panagtutudo, ngem awan ti tudo. No awan ti tudo, saan a makapagtalon dagiti mannalon. Awan ti maapit! Umay ti panagbisin! Matikagan ken maatianan dagiti ubbog! Awan ti danum nga inumen! Ti pagtaudan ken mangpataray iti elektrisidadtayo ket danum kadagiti dams. No awan ti tudo, bumaba ti level ti danum kadagiti dams ket kumapsut wenno mapukaw ti supplytayo ti kuryente. Rumigat ti biag, mapukaw ti biag.

C. Makaadipen a pammati(belief):

Gapu iti daytoy a pasamak, rumsua dagiti agduduma a patta-patta ken istoria ngem amin dagitoy a patta-patta ken istoria ket saan a pudno. Ipagarup dagiti tattao a ti panagdebosyon kadagiti sasanto, ken panagprosesyon ket isu’t mangparnuay iti tudo. Daytoy ket inuugma a debosyon a pammati. Saan a pudno daytoy. Ti kinakirang wenno kinaawan ti tudo ket imbunga iti pannakadadael dagiti rainforest wenno kabakirantayo. Iti panagkararag ket masapul a buyugan ti aramid. Dumawat tayo ti tudo ken nalamiis a pul-oy ti angin ngem masapul nga agmula tayo ti kaykayo ken saan tayo nga agpuor ti plastik ken agaramat kadagiti banbanag a makadadael ti tangatang tayo. Saan a maipagel wenno maiparit ti agkararag nga dumawat ti tudo wenno nalamiis a pul-oy ti angin ta dagitoy ket kasapulan tayo. Ngem masapul met nga ti kararag tayo ket buyugan ti aramid.

II. Tignay -Biag:

Datayo ti nangdadael iti lubongtayo. Ti nakillo ken naagum a wagas panagbiagtayo. Ket isu’t makaigapu iti Global Warming a mangdadael ti Biagtayo. Ngarud datayo met laeng ti agtignay a mangsaluad ti biagtayo. Ania ti mabalin ken kabaelantayo nga aramiden? Kas purok-gimong (BEC) iti bikariato isayangkattayo dagiti sumaganad:

1. Tunggal pamilia iti BEC ket masapul nga agmula iti kayo. Aramiden daytoy nga agtultuloy kada maikatlo nga a Domingo iti tunggal bulan.

2. Tunggal buniag, konpirma, primera-komunyon, agturpos ken agkasar ket masapul nga agmula iti kayo kas pagyaman iti biag ken ballaigi ken pannakipaset iti Tignay-Saluad– Tangatang.

3. Liklikan ti agaramat ken agpuor kadagiti plastic. Agusar kadagiti marunot (degradable) a materials.

4. Aginut iti kuryente. Agusar kadagiti fluorescent bulbs, saan nga incandescent bulbs (bombilia). Aginut iti danum.

5. Ipa-chek-up dagiti lugan, tapno saan unay a nangisit ti asukna (smoke belching) . Agusar iti bio-diesel.

Panggibus:

Dinadaeltayo ti urnos a pagbibiagantayo. Datayo met laeng Ngarud ti rumbeng nga agtignay tapno masalakniban daytoy lubong a pagbibiagantayo. Adda dagiti umiso ken kabaelantayo nga aramiden, a saantayo nga agpannuray iti debosyon wenno magic a solusyon. Agtignay itan para iti biagtayo ken biag masakbayan.



Bikariato San Markos
Parokia San Nikolas iti Tolentino Sinait, Ilocos Sur


27 Hulio 2007

Kakabsat a Papadi ken Mangiwanwan Purok-Gimong,

Ti sumurot ken Jesus ket agbiag ken agtignay para iti misyon-Pagarian ti Dios a kas naimbag a damag. Ti Pagarian ti Dios ket biag gin-awa nga agbatay iti kinalinteg ken kinapudno a mangwayawaya. Awisen ti Dios ti tunggal pamilia nga idauloan dagiti amma ken inna a makipaset iti bukodda a purok, nainsigudan nga ummong dagiti pamilia, a sumurot ken Jesus it misyon-Pagarian ti Dios.

Kas paset ti misyon-Pagarian ti Dios, agtignay dagiti purok-gimong a mangsalaknib ti aglawlaw a kas iti tangatang, baybay, karayan, kabakiran ken taltalon.
Iti naudi a Sanay Bikariato idi Hulio 24, 2007 sadiay Turod-Kapilya ni Maria, Bessang, San Juan, Ilocos Sur, nagnunumoantayo a kas bikariato nga agtignay a mangsaluad ti tangatang kontra global warming. Kas bunga daytoy a nagnunumoan, naaramid ti Manipesto Bikariato, “Tignay Saluad Tangatang” nga agserbi a kas adal ken tignay pammati.
Maisingasing a mabasa daytoy a Manipesto a kas pakdaar parokia tunggal Rambak Misa kadagiti Domingo ti bulan ti Agosto 2007, ken kadagiti taripnong dagiti amin a purok-gimong (BEC) ti bikariato tayo.
Dios ti agngina!