Tignay-Saluad-Tangatang

Tignay- Saluad– Tangatang:
Salaknibantayo ti Biagtayo
Manipesto Bikariato San Markos

Pakauna:

Ti pudno a makawayawaya a Pammati dagiti gimong a sumurot kenni Jesus ket Pammati nga agtignay a mangtaming kadagiti pakaseknan ti sibubukel a biag. Kas Bikariato a sumurot kenni Jesus iti Misyon–Mangwayawaya, iti maikasangapulo a Sanay Bikariatotayo, nagkaykaysaantayo ti agtignay a kas gimong iti Bikariato tapno makatulongtayo a mangatipa ti panagkaro ti Global Warming ken maliklikan ti nakaam-amak nga ibungana iti biagtayo.

I. Kasasaad-Aglawlaw: Global Warming
A. Ania ti maikagapu iti Global Warming?
Ti Global Warming ket saan a dusa nga iyetnag ti Dios kadatayo. Ti Global Warming ket saan a kadawyan a pasamak iti nakaparsuaan (Natural Occurrence). Ti Global Warming ket pinarnuay ti dakes, nakillo ken naagum a wagas ti panagbiagtayo. Ti Global Warming ket isu’t kumarkaro a panagpudot ti tiempo. Daytoy ket imbunga ti pannakadadael ti Ozone Layer ket ti pannakaurnong iti adu unay a kemikal (Carbon Dioxide) iti tangatang tayo. Ti panagpuor kadagiti plastic, panagaramat kadagiti kemikal nga abono ken pestisidio, asuk nga ipugso dagiti lugan, ken panangdadael kadagiti kabakirantayo ket isu’t maikagapu ken mangpakaro iti Global Warming.

B. Ania ti nakaam-amak nga ibunga ti Global Warming?

Gapu ti agtultuloy a Global Warming, marunaw dagiti yelo ken ngumato ti level ti danum kadagiti baybay ken taaw ket lumned dagiti lugar nga adda iti igid baybay a pakairamanan ti Ilocos Sur. Rumsua dagiti adu a didigra a kas iti napigsa a bagyo, layus, tikag ken maparnuay dagiti adu a kita ti makapatay a sakit.

Kas mariknatayo, dagitoy a bulan ket tiempo koma ti panagtutudo, ngem awan ti tudo. No awan ti tudo, saan a makapagtalon dagiti mannalon. Awan ti maapit! Umay ti panagbisin! Matikagan ken maatianan dagiti ubbog! Awan ti danum nga inumen! Ti pagtaudan ken mangpataray iti elektrisidadtayo ket danum kadagiti dams. No awan ti tudo, bumaba ti level ti danum kadagiti dams ket kumapsut wenno mapukaw ti supplytayo ti kuryente. Rumigat ti biag, mapukaw ti biag.

C. Makaadipen a pammati(belief):

Gapu iti daytoy a pasamak, rumsua dagiti agduduma a patta-patta ken istoria ngem amin dagitoy a patta-patta ken istoria ket saan a pudno. Ipagarup dagiti tattao a ti panagdebosyon kadagiti sasanto, ken panagprosesyon ket isu’t mangparnuay iti tudo. Daytoy ket inuugma a debosyon a pammati. Saan a pudno daytoy. Ti kinakirang wenno kinaawan ti tudo ket imbunga iti pannakadadael dagiti rainforest wenno kabakirantayo. Iti panagkararag ket masapul a buyugan ti aramid. Dumawat tayo ti tudo ken nalamiis a pul-oy ti angin ngem masapul nga agmula tayo ti kaykayo ken saan tayo nga agpuor ti plastik ken agaramat kadagiti banbanag a makadadael ti tangatang tayo. Saan a maipagel wenno maiparit ti agkararag nga dumawat ti tudo wenno nalamiis a pul-oy ti angin ta dagitoy ket kasapulan tayo. Ngem masapul met nga ti kararag tayo ket buyugan ti aramid.

II. Tignay -Biag:

Datayo ti nangdadael iti lubongtayo. Ti nakillo ken naagum a wagas panagbiagtayo. Ket isu’t makaigapu iti Global Warming a mangdadael ti Biagtayo. Ngarud datayo met laeng ti agtignay a mangsaluad ti biagtayo. Ania ti mabalin ken kabaelantayo nga aramiden? Kas purok-gimong (BEC) iti bikariato isayangkattayo dagiti sumaganad:

1. Tunggal pamilia iti BEC ket masapul nga agmula iti kayo. Aramiden daytoy nga agtultuloy kada maikatlo nga a Domingo iti tunggal bulan.

2. Tunggal buniag, konpirma, primera-komunyon, agturpos ken agkasar ket masapul nga agmula iti kayo kas pagyaman iti biag ken ballaigi ken pannakipaset iti Tignay-Saluad– Tangatang.

3. Liklikan ti agaramat ken agpuor kadagiti plastic. Agusar kadagiti marunot (degradable) a materials.

4. Aginut iti kuryente. Agusar kadagiti fluorescent bulbs, saan nga incandescent bulbs (bombilia). Aginut iti danum.

5. Ipa-chek-up dagiti lugan, tapno saan unay a nangisit ti asukna (smoke belching) . Agusar iti bio-diesel.

Panggibus:

Dinadaeltayo ti urnos a pagbibiagantayo. Datayo met laeng Ngarud ti rumbeng nga agtignay tapno masalakniban daytoy lubong a pagbibiagantayo. Adda dagiti umiso ken kabaelantayo nga aramiden, a saantayo nga agpannuray iti debosyon wenno magic a solusyon. Agtignay itan para iti biagtayo ken biag masakbayan.



Bikariato San Markos
Parokia San Nikolas iti Tolentino Sinait, Ilocos Sur


27 Hulio 2007

Kakabsat a Papadi ken Mangiwanwan Purok-Gimong,

Ti sumurot ken Jesus ket agbiag ken agtignay para iti misyon-Pagarian ti Dios a kas naimbag a damag. Ti Pagarian ti Dios ket biag gin-awa nga agbatay iti kinalinteg ken kinapudno a mangwayawaya. Awisen ti Dios ti tunggal pamilia nga idauloan dagiti amma ken inna a makipaset iti bukodda a purok, nainsigudan nga ummong dagiti pamilia, a sumurot ken Jesus it misyon-Pagarian ti Dios.

Kas paset ti misyon-Pagarian ti Dios, agtignay dagiti purok-gimong a mangsalaknib ti aglawlaw a kas iti tangatang, baybay, karayan, kabakiran ken taltalon.
Iti naudi a Sanay Bikariato idi Hulio 24, 2007 sadiay Turod-Kapilya ni Maria, Bessang, San Juan, Ilocos Sur, nagnunumoantayo a kas bikariato nga agtignay a mangsaluad ti tangatang kontra global warming. Kas bunga daytoy a nagnunumoan, naaramid ti Manipesto Bikariato, “Tignay Saluad Tangatang” nga agserbi a kas adal ken tignay pammati.
Maisingasing a mabasa daytoy a Manipesto a kas pakdaar parokia tunggal Rambak Misa kadagiti Domingo ti bulan ti Agosto 2007, ken kadagiti taripnong dagiti amin a purok-gimong (BEC) ti bikariato tayo.
Dios ti agngina!